Dewrêşê Evdî...
Serdeşt û Baronekan
| 14 Gulan 2010
Bextiyar Elî
Bikujekanî Serdeşt kên? Be dilniyayiyewe bikujekanî Serdeşt le estêreyekî dî û le şuwênêkî dî û le kultûrêkî diyewe nehatûn. Bikujekanî Serdeşt kurî em male wêraney Kurd in û perwerdey em awewayen. Bikujî Serdeşt ew komelgayeye ke le tawanî gewre bêdeng debêt û nahejêt.
Bikujekanî Serdeşt ewanen ke enfaliyan kird û tawanekeyan behêmnî têperî... bikujekanî Serdeşt heman piyaukujekanî şerî nawxon, ewanen leser tema'î naşer'î û gumrig û le ber xwastî dewlemendbûnî bêsinûr deyan sal komelgay êmeyan birde diwawe... ew robotanen ke hîzb dirustîkirdun û wek amêr hemû fermanêk cêbecêdeken, ew robotanen ke cige le nawî serok nawî hîç kesêkî dî nazan in...
Ew amêrdanen ke fêrkirawin û perwerdekirawin bo ewey rêz le keramet û jiyan û însaniyetî ewanî dî negirin... bikujanî Serdeşt ew frankişitayne tirsinakanen ke le laborî siyasetî kurdî û le mêjûy em siyasetewe hatûnetederê. ew siyasetey ke bîst sal lemewber omêdî eweman pêyî bû ke mirovî azadman bo dirustbikat, emro cige le gendel û newtfiroş û nuserkuj hîçî dî dirust nekird. bikujanî serdeşt le nawmandan, rojane deyanbînîn, ewanen ke le hemû şitêk bêdengin...
Ewanen ke berdewam bo behaneyek degerên qurbaniyekanî pê tawanbarbiken... ewanen ke beser bite siyasiyekanî xoyanda kirkewtûn û nawêrin leseriyan bicolên. Ewanen ke be bêdengî xoyan dengî hemûman dexinkênin. bikujanî Serdeşt le mêjûy wilatekewe hatûnete derê... ew tarmayiye reşen ke lem bîst saley diwayî da perwerdekirawe û amadekirawe her katêk her kesêk «hêlî sûrî» bezand, ewan bêne ser sehne û rolî xoyan bibînin. bikujanî Serdeşt ewanen ke bazrganî gewrey hêlî sûrin... pêşesazanî hêlî sûrin... ewanen ke karxaney hêlî sûriyan heye, be çeşnêk hîç şitêk niye le wilatî êmeda hêlî sûrî nebêt, ta ew endazeyey her yekêk le ême beşî çend carêk mirdin hêlî sûrman berdekewêt.
bikujanî Serdeşt ew siyasiye tirsnokanen ke roj be roj ziyatir têdegen ke teniya be fîşek detwanin nehêlin bîrbikeynewe. bikujanî serdeşt ewanen ke dekujin... ne leberewey pêwîste bikujin, belku leberewey ger nekujin, nazanin debêt çî biken yan çon bîrbikenewe... teniya şêwazî bîrkirdinewey ewan kuştin e, teniya katêk bîrdekenewe ke dekujin... be kurtî xuwênî Serdeşt, rengî têfkirîn û bîrkirdinewe û duniyabînî ewane... katêk ke nakujin ewe satî lêburdeyiyan niye, belku ew sateye ke tiyayda bîrnakenewe.
bikujanî Serdeşt teniya pispor û feylesufekanî «hêlî sûr» nîn, belku pispor û feylesufekanî bêdengîşin. hîç şitêk wek bêdengî bonî xuwên naşarêtewe... hîç şitêk wek bêdengî laşe winnakat. Ew mlîoneha dolarey rojane le kurdistanda dexirête mîdiyakanewe, bo dirustkirdinî qise nebuwe, belku bo begerxstinî karxaney gewrey bêdengî buwe... becorêk le hemû şarêkda deyan karxaney bêdengî xulqawe... bikujanî Serdeşt ledestkirdî ew karxaneyen, ew karxaneyey rojnamegerî û mîdiyay kurdî lem desaleda rêzimanêkî qisekirdin û yasa û ûrfêkî bo te‘ibîr dariştuwe, ewey peyrewî ew rêzimane nekat debêt demî pirbikirêt le gulle.
Bikujan le nawmandan... rojane deyanbînîn û silawiyan lêdekeyn... basî geşey abûrî û 'eqdî niwêy newt û dawetî goranêbêjî Turk û Ereb û dabeşkirdinî post le paytext û fîstfalî roşinbîrî û bernamey layv û dirustkirdinî şarî tazeman bodeken... ezîzan, bikujanî Serdeşt, heman bikujekanî xezelnusin. heman ew çîne komelayetiyen ke le «niwêmîran»î kurdistanewe hatote derê. Bikujanî Serdeşt ewanen ke serokekanî xoyan wek xuda seyrdeken û nahêlin em komelgaye le cehenemî emcore le petiriyarkiyetî rzîw derçêt, ke leser kirnoş û milkeçî kiwêrane dirustbuwe.
Bikujanî Serdeşt ewaneşn ke ew hemû fetuway kuştine şifredare nabîstin ke le mîdiyakanewe derdeçêt, ew hemû ftuway lixawkirdine nabîstin ke le hucrey tundrewe ciyawazekanewe derdeçêt. Bikujanî Serdeşt... hemû ewanen ke be bizmarêkî bçukîş bêt le dirustkirdinî tabutî azadîda beşdariyankirdewe... zorîşn ewaney ke rojane be bizmarî bçuk le dirustkirdinî tabûtî azadîda beşdarîdeken... zorîşn ewaney be teqelî bçuk le dirustkirdinî kifnî azadîda beşdarîdeken.
Bikujanî Serdeşt le nawmandan... ewan Serdeştiyan nekuşt bo ewey Serdeşt bikujin... belku bo ewey dûpatîbikenewe ke «egerî kuştin» hemîşe beser jiyanimaneweye... bo ewey pîşanîbiden ke sêberî şimşêrekaniyan hemîşe beser gerdinimaneweye.
Bedaxewe ewaney Serdeştiyan kuşt carêkî dî û le cêgayekî dîda dûbare Serdeştêkî dîş dekujnewe, carêkî tir berpirsêkî dî asayş dêt û delêt «bedwadaçûnî bodekeyn»... carêkî dî serokî hikumet be xoy û zerdexenekeyewe derdekewêtewe û delêt «eme cêgay nîgeraniye»... belam ezîzan be rastî cêgay nîgeranî niye... çunke ewaney bizmar le tabûtî azadî deden beyanî hemû deçnewe ser karekanî xoyan, ewaney karxanekanî bêdengî deben berêwe beyanî wek xoyan, be heman dest û be heman wijdanewe deçnewe ser karekanî xoyan, ewaney hêlî sûr Dirustdeken beyanî destdekenewe be çnînî hêlesurwerekanî xoyan ... berastî cêgey nîgeranî niye... çunke emşew niwêmîran be asayî dexewêt û beyanîş bê ewey Serdeştî lebîrbêt... le xew heldestêt... na cêgay nîgeranî niye, çunke karxaneyek heye sibeynê hemû şitêkman bîrdebatewe û demangêrêtewe bo rojî ber le kuştinî Serdeşt... na cenabî serok cêgay nîgeranî niye... hergîz cêgay nîgeranî niye.
www.bachtyar-ali.com
Jêder: Sbey
Latînîkirdinewe: KNN/Mihemed Çelkî
Subscribe to this comment's feed
Silavek ji dil
Cankurd